POLISI WATUMIA MABOMU KUWATAWANYA MADEREVA BAJAJI WALIOANDAMANA S'WANGA LEO.

ENEO la Soko  kuu mjini Sumbawanga  mkoani Rukwa  leo mchana liligeuka kuwa uwanja wa mapambano baina ya  askari polisi  na  madereva wa  pikipiki za magurudumu matatu’bajaj’  kugoma na kufunga barabara kwa kulala  kifudi fudi.

Kitendo hicho  kilisababisha kusiamama kwa huduma ya usafiri katika  barabara kuu  inayounganisha  mji ya Sumbawanga na Tunduma kwa saa kadhaa  na kusababusha askari  polisi  kufyatua  risasi hewani na kurusha  mabovu ya machozi  ili  kuwatawanya .

Askari wa kuliza ghasia (FFU)walifika eneo hilo la tukio  wakiwa  na silaha nzito wakitumia usafiri wa  gari  lao  lenye namba PT 1854 tayari kukabiliana na mgomo huo .

Licha ya madereva hao  kulala kifudifudi barabarani  pia waliweka  mbao zilizopigiliwa misumuri  kuzuia gari  lolote lisipitie eneo hilo la tukio na kuchoma matari ya magari  .

Shughuli za kawaida katika soko kuu la mjini Sumbawanga zilisimama kwa muda wa saa moja baada ya jeshi la polisi mjini hapo kuvutana juu ya mgomo wa ghafla ulioitishwa na madereva wa pikipiki za magurudumu matatu maarufu kwa jina la bajaji.

Kaimu Kamanda Polisi mkoa wa Rukwa, Kamishina Msaidizi wa Polisi, Leons Rwegasira amethibitisha kutokea kwa vurugu hizo na kueleza kuwa bado jeshi hilo  linatumia busara kulishughulikia tatizo hilo kabla ya kuanza kamata kamata.

Aliongeza  kuwa  hakuna majeruhi aliyeripotiwa wala uharibifu wowote uliotokana na vurugu hizo ambapo aliwasihi vijana kuacha kujichulia sheria mkononi na kuanza kurusha mawe kwenye gari la polisi.

 Vurugu hizo zilizodumu kwa  zaidi ya saa moja  zimetokea leo  saa sita mchana  ambapo  madereva hao wa bajaj  wanaaotoa huduma za usafiri katika Manispaa ya Sumbawanga na vitongoji vyake  vilisababisha taharuki kubwa  kwa wakazi  wa mjini humo.

Mwenyekiti wa madereva hao, Fred Jackson alisema wameamua kugoma kutokana na utaratibu wanaoutumia askari wa usalama barabarani mjini Sumbawanga ambapo kila siku wamekuwa wakipanga kiwango cha makusanyo ya fedha kutoka kwao na hivyo kulazimisha makosa yasiyokuwapo.

Alisema wameshajipanga kugoma mpaka uongozi wa serikali utakapoyashughulikia malalamiko yao ikiwa ni pamoja na kuwabaini askari wa usalama barabarani wanaofanya ukamataji kwa lengo la kujipatia kipato na siyo kusimamia sheria.